Ўзбекистоннинг икки вилоятида умумий қуввати 500 MW бўлган шамол электр станциялари қурилади
China Universal Energy компанияси Самарқанд ва Жиззах вилоятларида умумий қуввати 500 MW бўлган иккита шамол электр станциясини қуради. Ҳар бир лойиҳага 250 миллион доллардан маблағ инвестиция қилиниши кўзда тутилган.
Самарқанд ва Жиззах вилоятларида иккита шамол электр станциясини қуриш бўйича инвестиция шартномалари тасдиқланди. Бу ҳақда 7 май куни қабул қилинган президент қарорида келтирилган.
Ушбу лойиҳаларнинг пудратчилари сифатида Universal Energy’нинг шўба корхоналари Peak Wind Alpha вa Peak Wind Beta МЧЖлар кўрсатилган. Мажбуриятлар бажарилиши учун 9 млн долларлик банк кафолати кўзда тутилган.
Ҳар бир лойиҳа доирасида 250 MW қувватга эга шамол электр станциялари, электр узатиш линиялари қурилади. Инвестор ҳар бир лойиҳани амалга ошириш учун 250 миллион доллар ажратиши қайд этилган.
«Ўзбекистон Миллий электр тармоқлари» ушбу шамол электр станцияларида ишлаб чиқарилган электр энергиясини 25 йил давомида сотиб олиш кафолотини олган. Ўз навбатида, электр энергиясининг қанчадан сотиб олинишига аниқлик киритилмаган.
Муҳокамага қўшилинг
