ЎЗГАЧА ТУС ВА КЎТАРИНКИ КАЙФИЯТДА ЎТКАЗИЛДИ
Туманимизда 8-март – Халқаро хотин-қизлар куни муносабати билан ҳокимликнинг мажлислар залида байрам тадбири бўлиб ўтди. Унда туман ҳокимлиги, идоралар, давлат ва жамоат ташкилотларида ҳамда маҳаллаларда фаолият юритаётган илғор хотин-қизлар вакиллари иштирок этишди.
Туман маданият марказининг А.Ҳакимов, Д.Қобилов ҳамда Р.Тоҳиров ижросида муқаддас аёллар шарафига янграган қўшиқдан сўнг, туман ҳокими Асилбек Ашуров сўз олиб, нафосат соҳибалари – хотин-қизлар ва муҳтарама онахонларни байрам билан самимий қутлади.
Туманимиз раҳбари юртимизда хотин-қизларнинг жамиятдаги мавқеи, ролини янада ошириш, турмуш шароитини бундан-да яхшилашга қаратилаётган катта эътибор, амалга оширилаётган хайрли ишлар хусусида сўз юритди. Хусусан, ҳудудда хотин-қизлар бандлигини таъминлаш, тадбиркорлигини ривожлантириш ҳамда ижтимоий-сиёсий фаоллигини ошириш бўйича бажарилаётган ишлар ҳақида қисқача тўхталди.
Шундан сўнг ижтимоий-маънавий, сиёсий-иқтисодий ҳаётининг барча соҳаларида, хусусан, давлат бошқаруви ва вакиллик органларида, ишлаб чиқариш, соғлиқни сақлаш, таълим, маданият, тадбиркорлик ва фермерлик соҳарида фаолият юритаётган ҳамда оилалар мустаҳкамлигини таъминлашда ўз ҳиссасини қўшиб келаётган фаол хотин-қизларнинг бир гуруҳи туман ҳокимлиги ва Нуронийлар жамғармаси томонидан Фахрий ёрлиқ, ташаккурнома ҳамда қимматбаҳо совғалар билан тақдирландилар.
Аёлнинг нафосати ва назокати, вафо ва садоқати, ақл-заковати ва фидойилиги асрлар мобайнида ер юзида ҳаёт давомийлиги ва абадийлигига асос бўлиб келади. Шу боис ҳам дунёдаги энг буюк санъат асарлари, қўшиқ ва қасидалар, меъморий обидалар аёллар шаънига бағишлангандир..
Оила ва жамият устуни, ҳаётимизнинг файзи ва кўрки бўлган хотин-қизларни эъзозлаш, уларга ҳурмат ва эҳтиром кўрсатиш халқимиз учун азал-азалдан буюк қадрият бўлиб келган ва шундай бўлиб қолади. Чунки улар боис ҳаётимиз гўзал ва мазмунли, хонадонларимиз обод ва нурафшондир.
Халқаро хотин-қизлар кунига бағишлаб ўтказилган бу галги тадбир ҳар доимгиданда ўзгача тус ҳамда кўтаринки руҳда ўтди
