Prezidentimiz nutqidagi vazifalar ijrosida deputatlar faol ishtirok etadi
![](https://cdn.uza.uz/2023/09/05/07/01/6K0Mu4zv0oiKp1uq1FX6C1GQDmcSdSdA_front.jpg)
Oliy Majlis Qonunchilik palatasining navbatdagi majlisi o‘z ishini boshladi.
Majlisni kirish so‘zi bilan ochgan Qonunchilik palatasi Spikeri N.Ismoilov mustaqilligimizning 32 yilligi keng nishonlangani, istiqlol arafasida qatag‘on qurbonlarini yod etish marosimi o‘tkazilgani hamda davlatimiz rahbarining O‘zbekiston Respublikasi davlat mustaqilligining o‘ttiz ikki yilligiga bag‘ishlangan tantanali marosimdagi nutqida qayd etilgan ulkan natijalar xususida to‘xtaldi:
— Davlatimiz rahbari Shahidlar xotirasi xiyobonida qatag‘on qurbonlarini yod etish marosimida jadidlar hayotini o‘rganish, nohaq qatag‘onga uchraganlar xotirasini abadiylashtirish, ular yashagan mahallalarda nomlarini muhrlab qo‘yish lozimligini ta’kidladi.
Shuningdek, O‘zbekiston Respublikasi davlat mustaqilligining o‘ttiz ikki yilligiga bag‘ishlangan tantanali marosimda Prezidentimiz nutq so‘zladi. Fraksiyalar yig‘ilishlarida mazkur nutqdan kelib chiquvchi vazifalar belgilab olindi.
Davlatimiz rahbari bayram nutqida yurt ozodligi yo‘lida kurashgan, nohaq ayblanib, bu dunyodan armon bilan ketgan vatandoshlarimizning pok nomlarini tiklash borasida so‘nggi uch yilda ularning 856 nafari oqlanganini alohida qayd etdi va bunday ezgu ishlar davom etishini ta’kidladi.
Shuningdek, bayram nutqida ko‘plab yo‘nalishlar, erishilgan natijalarga to‘xtalib o‘tildi. Ilm-fan, ta’lim, AT sohalarini rivojlantirish, ushbu sohalar O‘zbekiston iqtisodiyotining lokomativiga aylanishi alohida qayd etildi.