Кейинги йилларда мамлакатимизда ихчам давлат бошқарувини жорий этиш, халқчил давлат фуқаролик хизматини ривожлантириш ҳамда кадрларга оид давлат сиёсатини янги босқичга олиб чиқиш бўйича қатор ислоҳотлар амалга оширилмоқда.
Жумладан, давлат хизматини маҳаллага тушириш бўйича бошланган катта ислоҳотларни изчил давом эттириш, давлат идораларида “маҳалладан – республикагача” тамойили асосида кадрларни ўстиришнинг янги тизими “Салоҳиятли кадрлар захираси” жорий қилиниши белгиланди.
– Давлатимиз раҳбарининг топшириғига мувофиқ Ўзбекистон Республикаси Президенти ҳузуридаги Давлат хизматини ривожлантириш агентлиги томонидан “Салоҳиятли кадрлар захираси” шакллантирилди. Бугунги кунда ушбу захирага 1 минг нафар номзод саралаб олинди. Шулардан 33 нафари Жиззах вилоятидаги давлат фуқаролик хизматчилари. Уларнинг 24 нафари маҳаллалардаги ҳоким ёрдамчилари, 7 нафари ёшлар етакчилари ва 2 нафари хотин-қизлар фаолларидир. Бугунги семинар-тренинг ана шу захирага олинган номзодлар учун ташкил этилди, – дейди Президент ҳузуридаги Давлат хизматини ривожлантириш агентлиги Жиззах вилояти филиали кадрлар маъмуриятчилиги бўлими бош инспектори Толибжон Эргашев.
Тадбирда Давлат хизматини ривожлантириш агентлиги Жиззах вилояти филиали масъул ходимлари томонидан семинар иштирокчиларига фуқаролик хизматчиларининг ҳуқуқлари ва мажбуриятлари ҳамда давлат фуқаролик хизматини амалга ошириш билан боғлиқ чекловлар, давлат фуқаролик хизматчилари амал қилиши зарур бўлган одоб-ахлоқ қоидалари, “Салоҳиятли кадрлар захираси”ни шакллантиришдан кўзланган мақсадлар тўғрисида тушунчалар берилди.
Шунингдек, “Салоҳиятли кадрлар захираси”га киритилган номзодларнинг имкониятлари, ҳуқуқ ва мажбуриятларига алоҳида тўхталиб, номзодларни юқори лавозимларга тўғридан-тўғри тавсия этилишида ҳисобга олинадиган омиллар ҳақида сўз юритилди.
скачать dle 12.0
