Ёшга доир пенсиялар фуқароларнинг мурожаатисиз тайинланади

 Пенсия таъминоти тизимига ахборот технологияларини фаол жорий қилиш орқали кўрсатилаётган хизматлар босқичма-босқич интерактив, композит ва проактив шаклга ўтказилмоқда.Пенсия таъминоти тизимига ахборот технологияларини фаол жорий қилиш орқали кўрсатилаётган хизматлар босқичма-босқич интерактив, композит ва проактив шаклга ўтказилмоқда.
Жумладан, Пенсия жамғармаси томонидан тайинланадиган 9 турдаги нафақаларнинг 4 таси интерактив, 3 таси проактив ҳамда 2 таси композит шаклда амалга оширилмоқда.
Ушбу ишларни давом эттириш, фуқароларга хизмат кўрсатишда қулайликларни яратиш мақсадида:
☄️ 2024 йил 1 январдан бошлаб қуйидагилар жорий этилмоқда:
- фуқаро пенсия тайинлашни сўраб қўшимча равишда Давлат хизматлари марказига ташриф буюрган ҳолда ёки Ягона интерактив давлат хизматлари портали (ЯИДХП) орқали (онлайн) мурожаат қилиш ҳуқуқи берилмоқда.
Шунингдек, фуқароларга пенсия тайинланганидан сўнг жамғарган пенсия пулини олиш учун Пенсия жамғармасидан қоғоз шаклидаги сертификат бериш тартиби бекор қилинмоқда.
Бунинг ўрнига, фуқаро жамғарган маблағларини Ягона интерактив давлат хизматлари портали ёки банкнинг мобил иловаси орқали олиш имконияти яратилмоқда.
☄️ Шунингдек, 2025 йил 1 мартдан бошлаб:
- 60 ёшга етган эркакларга ва 55 ёшга етган аёлларга пенсиялар “автоматик” тарзда, яъни ҳеч қандай ҳужжат талаб этмаган ҳолда ва фуқаронинг мурожаатисиз тайинланади;
- фуқаронинг шахсига оид барча маълумотлар (ёши, жинси, иш стажи, иш ҳақи, тўланган ижтимоий солиқ суммаси ва оила таркиби кабилар) вазирлик ва идораларнинг электрон базаларидан олинади.
Ушбу қулайликларнинг йўлга қўйилиши натижасида:
Биринчидан, фуқаролардан пенсия тайинлаш учун қўшимча ҳужжатлар йиғиш ҳамда ўзи истиқомат қилувчи Пенсия жамғармасининг ҳудудий бўлинмасига мурожаат қилиш талаб этилмайди.
Иккинчидан, пенсия ёшига етган фуқарога, пенсия “автоматик” тарзда тайинлангандан сўнг, фуқаронинг телефон рақамига “пенсия тайинланганлиги ва унинг миқдори” тўғрисида маълумот юборилади.
Шунингдек, пенсияга чиқмасдан иш фаолиятини давом эттириш истагида бўлган ёки пенсия миқдоридан норози бўлган фуқароларга “автоматик” тайинланган пенсияни тўхтатиш ҳуқуқи берилмоқда. 
Яъни, фуқарога “автоматик” пенсия тайинланганлиги ёки пенсия тайинланиши рад этилганлиги ҳақида СМС хабар юборилади. 
Фуқаро пенсия тайинланганидан ва пенсия миқдоридан ёки пенсия тайинланиши рад этилганидан норози бўлган тақдирда Пенсия жамғармасининг туман (шаҳар) бўлимига тегишли тартибда ариза билан мурожаат қилишлари мумкин.