Oʼzbekistonda oʼtgan sakkiz oyda qancha odam ovqatdan zaharlangani aytildi

 Unga koʼra, ushbu zaharlanish holatlarida jabrlanganlarning 86 nafari bolalardir.

Sanitariya-gigiena boshqarmasi ovqatlanish gigienasi bosh mutaxassisi Respublikada qayd etilayotgan ovqatdan zaharlanish holatlari va joylarda oʼtkazilayotgan profilaktik tadbirlar toʼgʼrisida maʼlumot berdi. Bu haqda Sanitariya-epidemiologiya qoʼmitasi xabar berdi.

Berilgan maʼlumotlarga koʼra, shu yilning oʼtgan 8 oyi mobaynida 39 ta holatda guruhli zaharlanish qayd etilib, ularda 414 nafar fuqaro jabrlangan. 3 nafar odam vafot etgan. Jabrlanganlarning 86 nafari esa bolalardir.

Zaharlanish holatlarining 21 tasi (53,8 %) botulizm, 1 tasi MTT (2,5 %), 13 tasi (23,0 %) ovqattoksikinfektsiyasi va 1 tasi (2,5%) kimyoviy zaharlanishlarga toʼgʼri keladi.

Аytilishicha, 21 ta holatda uy sharoitida tayyorlangan konserva mahsulotlarini isteʼmol qilish oqibatida yuzaga kelgan «Botulizm» kasalligining 3 tasi Jizzax, 6 tasi Samarqand va yana 6 tasi Fargʼona viloyatlariga toʼgʼri kelgan.

Eslatib oʼtamiz, avvalroq Toshkent viloyatida bir oilaning 4 nafar aʼzosi nomaʼlum etiologiyali ovqatdan zaharlanib vafot etganligi hamda Samarqandda esa bir oilaning ikki farzandi qoʼlbola tuzlamadan zaharlanib oʼlgani haqda xabar berilgandi.