Paxtakor tumanida 1-2-sonli maktablar foydalanishga topshirildi
Bugun erta tongdan Paxtakor tumanidagi maktablarda ham birinchi qoʼngʼiroq sadolari yangradi. Umumtaʼlim maktabi ostonasiga ilk qadamini tashlagan begʼubor qalb egalarining koʼzlarida ilmga chanqoqlikni koʼrish mumkin. Yozgi taʼtildan kuch-quvvatga toʼlib qaytgan yuqori sinf oʼquvchilari esa yangi oʼquv yilida yangi marralarni zabt etishni niyat qilgan.
Yangi oʼquv yili oldidan, tubdan rekonstruktsiya qilinib, oʼquvchilar ihtiyoriga topshirilgan 1-umumtaʼlim maktabida «Bilimlar kuni» munosabati bilan tadbir tashkil etildi. Tadbirda soʼz olganlar bolajonlarga yaxshi bilim olib, yuqori marralarni maqsad qilishlarini alohida taʼkidlashdi. Keyingi yillarda mamlakatimizda maktab taʼlimini rivojlantirish davlat siyosatining ustuvor yoʼnalishlaridan biriga aylanib, “Yangi Oʼzbekiston maktab ostonasidan boshlanadi”, degan ezgu gʼoya asosida bu sohada ulkan islohotlar amalga oshirilayotganligi eʼtirof etildi. Oʼquvchilar ishtirokidagi kontsert dasturi ham olqishlar bilan qarshi olindi. Mehmonlar, taʼlim sohasi faxriylari birgalikda yangi binoda yaratilgan sharoitlarni koʼzdan kechirib, birinchi sinf oʼquvchilariga oʼquv qurollaridan iborat “Prezident sovgʼasi”ni topshirdilar.
Shu kuni tuman hokimi “Mustaqillik darsi”da ishtirok etdi. Oʼquvchilarga bugungi baxtli va farovon hayotni qadrlash, buyuk ajdodlarga munosib avlod boʼlish, buning uchun chuqur bilim olib, Yangi Oʼzbekiston ravnaqi uchun astoydil xizmat qilish, Vatanga munosib farzand boʼlish lozimligini uqtirdi.
Taʼkidllash joiz, ayni “Bilimlar kuni”da Paxtakor tumanidagi 2-sonli umumtaʼlim maktabining oʼquv binosi ham taʼmirdan chiqarilgan holda foydalanishga topshirildi. Mazkur taʼlim muassasida ham oʼgʼil-qizlarga sifatli taʼlim berish uchun barcha sharoitlar yaratilgan.
