Ukamga ertak o‘qib beraman

Mana o‘quv yili yakunlanib, yana bir yoshga ulg‘aydim. Yuqori sinfga – 5-sinfga ko‘chdim. Endi meni yuqori sinf o‘quvchisi, deb atashadi. Qanday yaxshi, ammo to‘rt yil bizga saboq bergan birinchi ustozimiz bilan xayrlashish juda qiyin bo‘lyapti. Ustozimning yangi 1-sinfga rahbar bo‘lishini eshitib, to‘g‘risi, biroz xafa bo‘ldim. Axir eng mehribon o‘qituvchimning boshqa sinfga dars berishini hech o‘ylamagan ekanman. Bu gapni sinfdoshlarimdan ham eshitdim. Nima bo‘lganda ham, endi yangi ustozlarga o‘rganishimiz kerak, axir yuqori sinf o‘quvchisimiz-ku!

Yozgi ta'tilni uyda o‘tkazmoqchiman. Otam xorijga ishga ketganligi uchun sigirimiz “Oppoqoy”ni dalada boqishga yaqin yordamchiman. Opam Ra'no esa, kelasi yili kollejga topshiradi, shuning uchun o‘quv markaziga qatnaydi. Ukam Afzalbek 5 yoshda. Kun bo‘yi onam bilan birga. Har oqshom ukamga ertak o‘qib beraman. Bugun “Bo‘g‘irsoq”ni yoddan aytib bermoqchiman. Ertagim unga yoqishiga ishonaman!

Rayhona YARASHEVA,

Navoiy viloyati, Xatirchi tumanidagi

62-umumta'lim maktabining 4-“A” sinf o‘quvchisi