Tomorqadan unumli foydalanish oilalar faravonligini oshiradi
Tomorqadan oqilona foydalanishda gap katta. Aslida bilganga tomorqa koni foyda. Toʻgʻrisi, ilgari koʻpchilik bunga eʼtibor bermasdi. Baʼzi xonadonlardagi yerlarning oʻt bosib yotishi ham sir emasdi. Endi esa bu yumush davlat siyosati darajasida koʻtarildi.
Paxtakor tumani hokimining birinchi o’rinbosari Sherzod Shodmonov boshchiligida tuman hokimligi, mahallalardagi hokim yordamchilari hamda tadbirkorlikka qiziqgan fuqarolar ishtirokida, Bog’ishamol mahallasidagi issiqxonalarga PRESS TUR tashkil etildi.
Paxtakor tumanining “Bog’ishamol” mahallasida istiqomat qiluvchi Jamshidbek Ahmedovlar xonadonida qariyib 20 sotixdan ortiq issiqxona tashkil etilgan. Bugungi kunda pishib yetilgan pomidorlarni terish ishlari olib borilmoqda.
– Hududimizdagi fuqarolar mehnatkash, qariyb 90 foizdan ortigʻi tomorqadan katta daromad oladi. Shu bois, toʻq yashashadi. Bizda deyarli kam taʼminlangan oilalar yoʻq, – deydi faxr bilan xonadon egasi.
Jumanov Bahrom aka ham o‘z tomorqasidan samarali foydalanayotganlardan biri. 4 sotix yerga issiqxona tashkil etgan. Unda ham Jamshidbek tavsiyalari orqali pomodor ko’chatlari parvarish qilinmoqda.
– Agar har bir oila o‘z tomorqa xo‘jaligidan unumli foydalansa, yurtimiz bo‘yicha kam ta’minlangan oilaning o‘zi qolmaydi, – deydi Jumanov Bahrom aka – O‘zimdan qiyos. Har yili tomorqamdan yigirma milliondan ortiq daromad olaman. Bundan tashqari, qishloq xo‘jaligi mahsulotlari ham o‘zimizdan chiqadi. Shu bois kelgusi yildan boshlab issiqxonamni yanada kengaytirishni niyat qilyapman.
Paxtakor tumanida tadbirkorlikka qiziqishi baland bo‘lgan yoshlar, xotin-qizlar aniqlanib, ularga o‘z bizneslarini boshlashlari uchun zarur ko‘rsatmalar berilmoqda. Mazkur loyiha bugungacha mingga yaqin yurtdoshimizni tadbirkorlikka jalb etish, qo‘shimcha daromad topib, turmush faravonligini oshirishga xizmat qilmoqda.